É de balde e só necesitas o carné de bibliotecas ou activar a túa Tarxeta Millennium.

Se o que queres é ler en soporte dixital, accede á plataforma de préstamo de libros electrónicos e descarga o que queiras ou, sinxelamente, le na nube.

Ademais disto tes que saber que:

• Se tes a mobilidade reducida, temporal ou permanente, podes solicitar o préstamo e levámoscho a casa.
• Se queres solicitar o préstamo de algo que non atopas en ningunha biblioteca da cidade, consulta o préstamo interbibliotecario.

Podes escoller...

...entre máis de 200.000 exemplares dispoñibles para o préstamo nas bibliotecas municipais. As excepcións: os xornais, o último número das revistas, algunhas enciclopedias, dicionarios, exemplares raros, únicos ou de difícil reposición etc.

Cantos exemplares podo ter simultaneamente?

• 10 para socios/as individuais: revistas, libros e audiovisuais. Podes combinalos como queiras
• 30 para entidades, dos que só 10 poderán ser audiovisuais.

Durante canto tempo?

• Trinta días para socios/as individuais e entidades

E se necesito máis tempo?

• Podes renovar os teus préstamos de libros por outros 10 días máis, agás que outra persoa o teña reservado
• Terás que solicitar a renovación desde 7 días antes de que venza o prazo inicial de entrega
• As renovacións non se aplican a revistas nin a materiais audiovisuais (excepto para entidades ou para os documentais no caso dos socios individuais)
• Podes facelo na biblioteca, por teléfono ou a través desta web

E se quero un libro que está prestado a outra persoa?

• Se o libro que buscas está prestado a outro lector ou lectora podes reservalo
• Os socios/as individuais poden reservar ata dous exemplares, as entidades ata quince
• En canto o material reservado xa estea dispoñible, avisarémosche por teléfono ou correo electrónico e poderás recollelo na biblioteca na que o reservaches, dentro dun prazo máximo de tres días para socios/as individuais e de sete para entidades. Se non o fixeses nese prazo a reserva quedaría anulada
• Podes facer as túas reservas directamente na biblioteca ou por teléfono

E se quero un libro, CD, DVD... que está noutra biblioteca municipal?

Enviámosche o material á biblioteca que ti decidas e cando chegue avisámosche. Terás tres días para recollelo (sete no caso de entidades)

E se non cumpro os prazos de préstamo?

O atraso na devolución leva unha suspensión temporal do préstamo: un día por cada documento e día de atraso

Quero devolver o que me levei en préstamo

• Para a devolución de materiais non é necesario traer o carné e calquera familiar ou amizade pode facelo por ti.
• Podes devolver os materiais en calquera biblioteca da Rede.
• Nalgunhas bibliotecas atoparás unha caixa de correos de devolución para depositar os libros, CD, DVD... que queres devolver cando as bibliotecas estean pechadas.
  • As bibliotecas de Castrillón, Fórum, Rosales, Monte Alto e o punto de préstamo de Mesoiro teñen unha caixa de correos de devolución situado na parte exterior do edificio onde están localizados, co que podes realizar a devolución a calquera hora todos os días da semana.
  • A biblioteca de Durán Loriga ten unha caixa de correos de devolución dentro do edificio, co que, aínda que a biblioteca estea pechada, podes realizar a devolución dentro do horario de apertura do edificio.
• Temos a certeza de que entregarás os materiais que levaches prestados en tan bo estado como no que os retiraches.

Perdín un libro, CD, DVD... que tiña prestado

• A perda ou deterioración de material suporá repoñer o material extraviado ou deteriorado. Se xa non está dispoñible no mercado, contacta coa biblioteca na que o retiraches para que che orienten ou che suxiran algún outro libro, CD ou DVD de características similares.

Lembra que...

• Para poder gozar do servizo de préstamo é imprescindible a presentación do carné das bibliotecas ou da Tarxeta Millennium activada.
• Para as devolucións non fai falta o carné e calquera pode facelo por ti.

Quero saber que libros, revistas, CD... hai nas biblios: o catálogo

Se queres saber se nas bibliotecas está ese libro que che interesa, que obras hai dunha autora determinada ou os materiais dispoñibles sobre un tema do teu interese podes consultar o catálogo. Poderás saber en que biblioteca está o que buscas, se está prestado e cando o devolven. Se che xorde algunha dúbida podes pedirnos axuda no chat ou por teléfono. Non esquezas que os libros se envían dunhas bibliotecas a outras para que os recollas na túa biblioteca máis próxima e que se non atopas o que buscas podes suxerirnos novas compras.

Quero propoñer unha compra

Se non atopas na biblioteca algún libro, DVD, CD ou calquera outro material que che interese, podes suxerirnos que o compremos. Podes facelo a través da web enchendo un formulario de solicitude de compra que tamén está dispoñible en todas as bibliotecas.

Debes de ter en conta que para facer esta suxestión de compra terás que ser socio/a de a biblioteca. Comprometémonos a dar unha resposta á túa solicitude no prazo máximo dun mes. Poderás facer un máximo de dúas peticións de compra por trimestre.