Mais somos tamén conscientes de que non abonda con identificar e destacar os materiais; cómpre tamén facilitar espazos seguros para o debate, a reflexión e o encontro. Con esta finalidade puxemos en marcha no ano 2016 o que sería (e aínda é) o primeiro e único club de lectura LGTB de Galicia: o #QUEERuña.

O catálogo das bibliotecas destaca os materiais que reflicten a realidade LGTB e para facilitar a súa localización ofrecemos videotitoriais específicos coma o que podes atopar ao final desta páxina.

Mais tamén nutrimos as canles que temos activas en Spotify e Ivoox: ampliamos a selección musical na listaxe "As municipais entenden" e poñemos as nosas voces nas lecturas curtas que grabamos dos nosos textos favoritos. Con estes audios poderás escoitarnos lendo materiais LGTB dentro da iniciativa "Lemos para ti".