O 3 de xuño de 1999 inauguramos a Biblioteca Municipal de Monte Alto, que se converteu na sexta biblioteca da rede municipal da Coruña. Foi a primeira biblioteca municipal totalmente informatizada, tanto no servizo de préstamo como na xestión de acceso á colección e á oferta de ordenadores de acceso público. Foi, tamén, pioneira en contar cunha aula de informática destinada á formación.

Xogou e xoga un papel fundamental na promoción da lectura e a cultura na comunidade.

A biblioteca actúa como un equipamento sociocultural de proximidade, dando servizo e atención ao conxunto da veciñanza da súa zona de influencia, e especialmente a aqueles sectores sociais con menos posibilidades de acceso ao coñecemento e susceptibles de marxinalidade e á práctica cultural, lectora e formativa.

O barrio de Monte Alto

Monte Alto é un barrio da Coruña situado no sector peninsular da cidade, preto do centro e da emblemática Torre de Hércules. Cunha poboación estimada de 29.500 habitantes, Monte Alto consolidouse como un barrio obreiro e popular, cunha intensa actividade sociocultural e un forte carácter reivindicativo.

Este barrio é fogar de numerosas agrupacións musicais e culturais, e foi berce de importantes figuras da cultura galega, como os escritores Manuel Rivas, Iago de la Campa, Jacobo Paz Limia, escritoras como Emma Pedreira e María Canosa; a directora, produtora e guionista de cine Sandra Sánchez Cachaza, Alberto Vázquez Rico, director de cine e ilustrador, gañador de varios Premios Goya, Martín Romero Outeiral, autor do cómic Uxío, a ilustradora Julia Lago ou o cómico Oswaldo Digón, sen esquecernos da mítica banda Os Diplomáticos de Monte Alto.

Os 25 anos da Biblioteca de Monte Alto en cifras

• 1.200 actividades realizadas
• 24.000 participantes nas actividades
• 275.000 sesións de Internet
• 13.900 persoas socias
• 6.250 días dando servizo con 65.000 horas de apertura
• 32.000 documentos no fondo
• 2.900.000 visitas
• 1.200.000 préstamos realizados

Para festexar estes 25 anos preparamos unha programación de actividades onde xuntarnos e lembrar o que fomos e o que somos, sen perder nunca a ilusión por seguir traballando para chegar ao que queremos ser.

Programación de actividades

• Martes 11 de xuño, ás 19.00 h nun acto central, un faladoiro baixo o título " FALADOIRO Biblioteca Municipal de Monte Alto: 25 anos facendo barrio " no que participarán persoas de referencia no campo da escrita e da ilustración que contan cunha vinculación especial coa biblioteca: Arturo Iglesias (ilustrador), Bea Lema (ilustradora), Emma Pedreira (escritora), María Canosa (escritora). O acto estará conducido e amenizado por Xurxo Souto (escritor, músico e profesor).

Neste mesmo acto terá lugar a presentación e proxección da peza documental "A biblioteca Municipal de Monte Alto, 25 anos facendo barrio". O vídeo recolle o testemuño de entidades, asociacións e persoas usuarias que plasman o que implica a biblioteca nas súas vidas.

• Mércores 12 de xuño, a celebración será para as familias e crianzas. Espectáculo infantil-familiar de música e xogos tradicionais " O Xogueteiro: espectáculo de música e xogos tradicionais na praza dos Avós, se o tempo o permite.

Todas as actividades son de balde e con entrada libre ata completar a capacidade.