Este ciclo de charlas de divulgación científica, coordinado pola profesora Ana González Tizón e a Biblioteca Fórum Metropolitano, xurde da colaboración da Asociación de veciños de Oza, A Gaiteira e Os Castros e o Grupo de divulgación científica e innovación docente da Universidade da Coruña, UDCiencia i+d. 

Este grupo vén desenvolvendo unha intensa actividade no campo da divulgación científica, a innovación docente e a aprendizaxe-servizo.

O programa nace con vocación de permanencia. Será o último luns de cada mes ás 19 h. na Biblioteca Fórum, con acceso libre até completar capacidade.

O luns 30 de maio temos a terceira charla do programa:

Enfermidades ambientais

Con Ana M. González Tizón e Icía Lista Pombo

A nosa actividade diaria está sometida a ruídos, aire contaminado, emisións de gases, po. Que comes? Que bebes? Que respiras? Que escoitas? A túa vida diaria repercute na túa saúde? A resposta é si e imos saber como e por que.

• Ana González Tizón

Profesora de Xenética e trekki total. Entre clases, investigación, cinema, e outros variados mesteres fago oco para divulgar e liar aos estudantes novos a que tamén o fagan.

• Icía Lista Pombo

Ola! Son bióloga molecular e futura (espero) Policía Científica (cruzamos dedos). A rama que máis me gusta da Bioloxía é a Xenética, pero no que a divulgación se refire non podería ser tan concreta, e apúntome a un bombardeo. Podes escoitarme falar sobre bacterias e antibióticos, sobre microplásticos, plantas carnívoras...O mesmo che fago un xabón en 3 minutos que che ensino vexetais que se moven!