O 23 de abril de 1616, dous xigantes da literatura mundial morreron. Dous precursores cuxa obra revolucionaría a forma en que se concibiu e escribiu a fición dende entón: Miguel de Cervantes e William Shakespeare. Esta coincidencia é a razón pola que o 23 de abril foi escollido como Día mundial do Libro e dos dereitos de autor.

Dende a Biblioteca Infantil e Xuvenil - Durán Loriga queremos poñer o noso pequeno gran e empezar a celebrar o Día do Libro o sábado 21 de abril cun contacontos dalgúns dos títulos que máis nos fan disfrutar, como El Grúfalo, de Julia Donaldson e Axel Scheffler, ou Un libro, de Hervé Tullet.

Para participar, só tedes que inscribirvos (os que teñades entre 5-10 anos, que os adultos non precisan facelo) e vir á Biblioteca Infantil e Xuvenil o sábado pola mañá con moitas ganas de compartir letras, imaxes e todo un mundo de lecturas!