O obxectivo do programa Libros Viventes é compartir historias de vida, coñecementos e intereses co alumnado dos centros de secundaria da nosa contorna, a partir dos cales reforzar o traballo en valores e o desenvolvemento persoal da mocidade dentro e fóra das aulas. Deste xeito, preséntase como un método innovador para promover o diálogo, reducir prexuízos, fomentar o entendemento entre as persoas e promover o intercambio de historias que, noutras circunstancias, non se podería ter compartido.

Nesta ocasión, realizamos unha edición especial polo Día da Biblioteca, efeméride que baixo o lema #BiblioTeCuida destaca este ano o papel das bibliotecas como espazos libres e abertos, que se preocupan por atender as necesidades das persoas usuarias e por constituír un apoio no coidado das persoas e das comunidades. Participan nesta edición como persoas-libro:

• Isabel Espinosa Rey | Profesora Montessori e artista

"A situación de inseguridade no país, especialmente no lugar onde vivía, fixo que tivésemos que deixalo todo, era urxente saír de México. Marchamos en coche o meu esposo máis eu, os nosos tres fillos, algo de roupa, xoguetes e moitos libros, esa foi toda a nosa equipaxe".

"A arte ábreche unha porta para contactar coa esencia, coas emocións, coa túa propia beleza".

• Ángela Pardal | Muller galega, trans, lesbiana, artista, música e feminista

"Sempre vivín nun ambiente moi enrarecido e cambiante, sen espazo para expresarme ou recibir a atención que precisaba. A miña adolescencia foi moi complicada, e a iso sumouse o terremoto interno que intentaba esquivar acerca da miña identidade de xénero".

"A cousa máis bonita que consigo coa música é que me axuda a coñecerme".