Charla: Un rural próspero en todos os sentidos: a experiencia do proxecto "Nosa Granxiña"

Sandra Martínez Feijóo (Proxecto: Nosa Granxiña)

• Martes 18 de febreiro ás 19.00 h

• Acceso libre até completar a capacidade

Tras sufrir e observar de primeira man unha das problemáticas máis devastadoras que ameazan o noso rural, a explotación madeireira do eucalipto, Sandra e a súa familia deciden mercar case 5 hectáreas de plantación de eucalipto para reconvertelo en bosque autóctono de forma natural, con intervención animal, co obxectivo de recuperar o noso ecosistema e devolverlles aos nosos montes a vida que lles falta, e ese é o comezo de "Nosa Granxiña".

"Nosa Granxiña" é un proxecto de vida onde non só ensinamos que o rural galego ten cabida para a mocidade, futuro e prosperidade, senón que, grazas ao poder das redes sociais estamos a crear un espello de aprendizaxe accesible para todo o mundo, recompilando toda esa sabedoría popular das persoas maiores da nosa contorna para que perviva, para que non se perdan e para que grazas a ela poidamos seguir coidando a nosa terra, aprendendo dela e garantíndolle un futuro próspero.