Planificación e deseño de actividades dirixidas a persoas con diversidade funcional coa finalidade da súa integración na biblioteca.

ACHEGA, as sesións

En colaboración coa Asociación Participa para a Inclusión Social, van dirixidas a grupos de persoas pertencentes a entidades de Diversidade Funcional da zona de influencia da Biblioteca Forum, interesadas en actividades inclusivas e de achega ao libro e á lectura.     

A execución das actividades ten lugar na sala de adultos da Biblioteca Fórum en horario de mañá, convivindo co resto de usuarios e do transcorrer da vida diaria da Biblioteca Este é un punto fundamental no proceso integrador das persoas en risco de exclusión social, facéndoos partícipes como usuarios de pleno dereito a estar, sen restricións e sen espazos reservados.

O número de participantes non supera nunca os 10/ 12 por sesión. Desta maneira, todos os integrantes poden participar activamente. Os materiais utilizados nos sesións están adaptados e deseñados en función do perfil de cada colectivo,. destacando o manexo de recursos audiovisuais.

Club de Lectura Fácil "Fiando Historias"

"Fiando historias" nace da conciencia que toma a Biblioteca Fórum para exercer accións de calado social que redunden en mellorar a vida daqueles cidadáns que están á marxe da programación habitual da biblioteca. Xorde así a idea de crear un Club de Lectura Fácil para pacientes de Sáude Mental co obxectivo de facelos partícipes dunha actividade que axude a mellorar o seu nivel de compromiso de participación activa na sociedade. Trástase dunha vía que permite enriquecer a calidade de vida destas persoas, e en tanto que este factor repercute na vida de todos, achega un valor engadido á sociedade en xeral.

Son sesións semanais cun grupo formado por usuarios de diferentes niveis, onde as persoas de competencias máis altas poden actuar como "titores facilitadores" e será moi enriquecedor para eles e os que reciban a súa axuda. A particularidade son as actividades complementarias que axudan á comprensión dos textos e á socialización e interacción dos membros entre eles. Son unha vía que permite enriquecer a calidade de vida destas persoas.

A importancia da saúde mental destácase na definición de saúde que figura na propia Constitución da OMS: "A saúde é un estado de completo benestar físico, mental e social, e non soamente a ausencia de afeccións ou enfermidades".

Visitas á Biblioteca

A demanda dos colectivos ou entidades para dar a coñecer a biblioteca como lugar de integración social.  Abertas durante todo o ano son impartidas co apoio e colaboración de profesionais do ámbito educativo e sociosanitario da Asociación Participa, conformando así un equipo multidisciplinar para atender todas as necesidades do grupo de participantes.

As entidades que participan de dentro de este proxecto teñen a oportunidade de visitar á biblioteca no turno de mañá e ser partícipes da súa vida e mesturarse con resto dos usuarios e usuarias.

A través de proxeccións, charlas e conversas preséntaselles toda a programación accesible que está ao seu dispor. Proporciónaselles tamén, recomendacións bibliográficas con niveis de lectura de todo tipo.

A Biblioteca Forum decide manter e crear centros de interese que están directamente relacionados co Proxexto ACHEGA, para apoio e fomento de hábitos de lectura entre a pobación con diversidade funcional e as súas familias.

Centro de Interese "Biblioterapia, Lecturas Saudables".

A Biblioteca Forum Metropolitano súmase á Biblioterapia, un proxecto promovido pola Axencia de Coñecemento en Saúde e a Consellería de Sanidade da Xunta de Galicia, coa colaboración da Rede Galega de Bibliotecas, colexios profesionais e sociedades científicas, asociacións de pacientes e expertos en saúde e literatura e a colaboración e financiación de Lundbeck.

A Biblioteca Forum decide integrar o Centro de Interese Biblioterapia (ver Colección: Saúde ) dentro do Proxecto ACHEGA, a Biblioteca como Espazo Inclusivo para Persoas con Diversidade Funcional.  É un espazo adicado a consulta de material bibliográfico para que persoas con diversidade funcional, persoas que experimentesn situación de malestar emocional ou mesmo familiares de ambos colectivos poidan coñecer máis acerca do tema.

A Biblioterapia consiste no uso da lectura cun obxectivo terapéutico (libros de autoaxuda) ou de desenvolvemento (novelas). Recórrese a ela principalmente para apoiar o tratamento de trastornos mentais e problemas emocionais e para promover a saúde mental

Ter acceso aos libros recomendados pode axudar a pacientes e familiares a entender mellor e afrontar os problemas de saúde, así como a mellorar o seu benestar.

Neste CI podes atopar: Libros de autoaxuda para axudar a lidiar con numerosos problemas: depresión ansiedade, autoestima, desenvolvemento persoal.., libros de ficción e material audiovisual nos que unha enfermidade, trastorno ou problema psicolóxico teña protagonismo na historia, tanto para persoas adultas como para nenos e nenas.

O fondo deste centro de interese está seleccionado seguindo a guía oficial de Biblioterapia.

Centro de Interese "Lectura Fácil".

A lectura fácil é unha ferramenta de comprensión e fomento da lectura que garantiza a accesibilidade á información e á cultura a todas as persoas, con independencia das súas capacidades.

Os documentos que integran este centro de interese diríxense a calquera persoa que teña dificultades para comprender un texto escrito, e isto abarca desde persoas con discapacidade intelectual, inmigrantes, persoas con escolarización deficiente, persoas maiores...

Os libros de lectura fácil caracterízanse por:

• Ter una tipografía máis clara e fácil de ler.
• Ter un corpo de letra máis grande.
• Ter un maior interliñado entre liñas e parágrafos.
• Ter marxes maís amplos.
• Ter diálogos sangrados e separados da narración.
• Ter ilustracións renovadas, máis accesibles, que serven como apoio ao texto: son sinxelas, concretas, con cores sólidos e cun maios contraste entre figura e fondo.
• Ter un texto adaptado e accesible: sintaxis, ortografía, gramática e léxico máis sinxelo para evitar ambigüidades. Suprímese tamén, a linguaxe figurada e metafórica e as estructuras complexas.
• Ter una linguaxe directa, concreta e sinxela.

Centro de Interese "Comunidade Xorda"

Espazo dentro da biblioteca onde podes atopar recursos e material bibliográfico relacionado coa diversidade auditiva tanto para usuarios con diversidade autivida como para todo o público en xeral.

O obxectivo é dar a coñecer o fondo bibliográfico sobre este tema, conseguir o fomento de hábitos de lectura entre a poboación con discapacidade auditiva e sensibilizar aos usuarios en xeral, para lograr que as persoas xordas sintan a biblioteca como un espazo propio de participación.

Este centro está formado por documentos que recollen todo tipo de información relacionada coa comunidade xorda. Como punto de partida a Federación de Asociacións de Persoas Xordas de Galicia facilitou unha selección bibliográfica daqueles documentos imprescindibles para o centro de interese, selección que se completou consultando distintos catálogos de publicacións de entidades que traballan con este colectivo.

Aquí atópanse dicionarios, lexislación, manuais, estudos e investigacións sobre diversos aspectos relacionados coa discapacidade auditiva, ademais de narrativa que trata o tema da xordeira ou ten como protagonistas a persoas xordas. Todos os documentos do centro de interese levan pictogramas identificativos.