Saúde menstrual e Endometriose é o faladorio que teremos na biblioteca Durán Loriga para dar a coñecer e recoñecer os síntomas e os tratamentos, así como a abordaxe que dende o sistema público de saúde se fai, da Endometriose e o sesgo de xénero desta doenza, que afecta á saúde menstrual de unha de cada dez mulleres en idade fértil.

Contaremos con Verónica Ramilo, da  Asociación querENDO Mulleres con Endometriose, para dar luz á Endometriose, que obriga a convivir coa fatiga crónica e a dor e xa afectra a máis de 60 mil galegas.

Os problemas da saúde menstrual xeran discriminación e estigmatización de millóns de mulleres. A menstruación debe ser entendida como un proceso biolóxico para que as persoas que menstrúan non sexan renegadas nin excluídas, nin sintan medo nin vergoña.

En todas as nosas bibliotecas temos a disposición da cidadanía libros informativos sobre hixiene e saúde menstrual. Nas bibliotecas de Durán Loriga, Monte Alto e Rosales temos, ademais, a sección "Rompendo Regras", un centro de interese que toma o seu nome do Laboratorio de Participación cidadá en prol dunha menstruación digna e ecosaudable, do Grupo de Igualdade da Facultade de Ciencias da Educación da UDC.