Cada un deles pon á túa disposición unha selección de materiais que che resultarán de interese para axudarche a organizar unha viaxe, consultalos durante a túa estancia no lugar elixido ou, simplemente, para coñecer outros lugares sen moverte da casa.

Este centro de interese está composto por:

• guías de viaxes (dirixidas a público infantil e tamén a persoas adultas),
• documentais,
• literatura de viaxes,
• revistas, e
• dicionarios ou métodos sinxelos para facilitar a comunicación en países con distinto idioma.

Para localizar estes materiais no catálogo en liña podes consultar o titorial de procuras, utilizar a procura avanzada ou consultar os seguintes apartados con exemplos:

GUÍAS DE VIAXES

Dispoñemos de guías de viaxes de todos os continentes e países. Para localizar no catálogo en liña as guías dunha cidade concreta podes facelo combinando o nome da cidade do teu interese cos termos "guías turísticas" no campo "materia" do buscador. Madrid, Budapest, París ou California son algúns exemplos.

Se che interesa algún lugar do territorio español, ten en conta que neste centro de interese atoparás guías das distintas comunidades autónomas e provincias, ou mesmo rexións. Podes buscar polo seu nome seguindo o esquema anterior. Galicia, Ourense, Estremadura e Cáceres son algúns exemplos.

Dentro desta sección dispós tamén de numerosas guías de todo o relacionado co Camiño de Santiago (rutas e vías, monumentos, festas, preparación etc.).

REVISTAS

Nas bibliotecas atoparás revistas especializadas nesta temática, como son:

• Viajar
• Viajes
• Lonely Planet: traveller
• ¡Hola! Viajes
• Grandes espacios

LITERATURA DE VIAXES

Atoparás narrativa e ensaio con temática de viaxes

MATERIAL AUDIOVISUAL

A forma máis sinxela para atopar este tipo de materiais no catálogo en liña é combinar unha procura cos termos DVD, CD, CD-ROM ou DVD-ROM con "guías turísticas". Por exemplo, para recuperar todos os documentais que tratan esta temática lanza unha procura que combine "DVD" e "guías turísticas".

DICIONARIOS DE IDIOMAS/GUÍAS DE CONVERSA

Quen non necesitou botar man dun dicionario ou guía dun idioma nun país estranxeiro? Pois non esquezas levar o teu en préstamo. Localízao no catálogo buscando por "viaxes" e o idioma do teu interese, por exemplo, "lingua rusa". Así atoparás Ruso para viaxar.