Mergúllate no apaixonante mundo do cómic neste verán repleto da oitava arte, onde preparamos unha programación chea de actividades nas bibliotecas municipais.

En todas as bibliotecas e durante o mes de agosto hai unha mostra de cómics centrada nesa estación especial por moitos aspectos que é o verán. Os nenos máis pequenos que aínda non dominan a lectura poderán gozar de sesións onde lles contaremos cómics e aqueles profesionais e afeccionados terán talleres específicos sobre a linguaxe narrativa deste medio e a súa relación co deseño gráfico. Non esqueceremos a aquelas persoas con discapacidade que poderán achegarse ao medio cunha nova perspectiva grazas a talleres específicos.

Como levamos facendo nos últimos 15 anos, as bibliotecas municipais estarán na Rúa da BD de Viñetas desde o Atlántico. Na nosa caseta, ademais de poder informarte da feira, exposicións e autores invitados, poderás participar no noso concurso "Canto sabes de cómic?", levar en préstamo calquera cómic da nosa selección de catálogo e gozar dun espazo de lectura para consultar ou simplemente charlar deste mundo con bibliotecarios especializados.