A estas horas os risos cansados entonan cancións de regreso. Unha cita de amor nun bar solitario cai como a folla murcha dun calendario.

Luísa Villalta.

Cada Nadal trae consigo sentimentos encontrados, cun punto de saudade polos Nadais pasados, lembrando cancións antigas e citas de amor, cal o fragmento do texto da coruñesa Luísa Villalta, que quixemos que encabezase este portal de Nadal das bibliotecas como temperá homenaxe á poeta á cal se lle dedicará o Día das Letras Galegas en 2024.

Pero o Nadal non só é saudade do pasado: tamén é presente, e crear lembranzas neste presente que axuden a despedir un ano que marcha e darlle a benvida ao novo.

Participa connosco do que temos preparado (xogos, obradoiros, contacontos... e mesmo un concerto!) e bota un ollo á nosa guía que, ano tras ano, deixa na túa porta as nosas suxestións de "Historias de regalo" para estas datas.

Ademais desta guía, pasa pola plataforma de streaming Coruña eFilm para enchouparte de maxia nadalicia grazas ao teu carné de biblioteca e as nosas Películas para un calendario de advento.

Agardámoste e aproveitamos para desexarche, desde este recunchiño, felices festas!

Actividades de Nadal nas bibliotecas

Biblioteca Municipal Durán Loriga: Nadal de letras e xogos

• Calendario de advento: descubre un xogo cada día. Ven con quen che apeteza para xogar xuntos (durante o mes de decembro).
• Contacontos do libro "Regalos", de Estrella Ortiz + Obradoiro de bonecos de neve (20 decembro)
• Contacontos do libro "El festín de Navidad", de Nathalie Dargent + Obradoiro de grilandas (21 decembro)
• Presentación do libro "Aventura en la fraga mágica", de Marita Muñiz (27 decembro)

Biblioteca Municipal Fórum: un Nadal en familia

• Contacontos e obradoiro de Nadal: As cousas que importan: un Nadal en familia (21 decembro)

Biblioteca Municipal de Estudos Locais: concerto en Nadal

• Concerto en Nadal , do grupo de pop Nouvelle Cuisine formado na Coruña no 2011e que fará un repaso polos temas que o fixeron famoso na escena musical (22 de decembro).

Recomendacións de Nadal

Podes desfrutar en liña de recomendacións de lectura, ideas de agasallo, e propostas de cinema:

• Calaméo: Guía "Historias de regalo" 2023
• Coruña eFilm: Listaxe de Películas para un calendario de advento.

Outras actividades

Ademais das actividades vencelladas co Nadal, o ritmo nas bibliotecas non para! Bota un ollo a estas outras actividades que terán lugar nestas datas.

Biblioteca Municipal Fórum

• Presentación do libro "El Ocaso del faro", de Efrén Fernández (18 decembro).

Biblioteca Municipal Ágora

• Cineclub: mulleres LBT: Tangerine (19 decembro).