Este ano volvemos sumarnos a esta interesante iniciativa internacional de poñer en valor os xogos nas bibliotecas, promovida por unha organización internacional do ámbito bibliotecario, a ALA (American Library Association) e dirixida por voluntarios de todo o mundo para reconectar comunidades a través das súas bibliotecas en torno ao valor educativo, recreativo e social de todo tipo de xogos.

Na biblioteca Municipal Durán Loriga apostamos por poñer en valor o importante papel que poden tomar os xogos nas bibliotecas e entendemos que as programacións arredor dos xogos personifican a biblioteca creando un lugar comunitario para socializar e xogar. Sumámonos a esta iniciativa co obxectivo de sensibilizar sobre os beneficios sociais e educativos do xogo.

Dentro da programación do IGM na biblioteca Durán Loriga queremos que veñades a pasar esta mañá rodeados de xogos de sempre e tamén a coñecer novos xogos. Para este día contaremos con: MELGA (Museo etnolúdico de Galicia) que nos traerá xogos tradicionais, e coa Asociación DRACO que nos invitará a xogar en directo xogos de mesa e de rol para todas as idades. Invitámosvos a vir a biblioteca a xogar en familia, cos amigos e amigas, cos veciños e veciñas! Non é necesaria a inscrición previa nesta actividade.