Podes acceder a calquera ordenador de uso público directamente, sempre que non estea reservado, ou ben facer unha reserva en liña para a biblioteca, hora e día que ti elixas. En ambos os casos necesitarás un usuario e unha clave.

Como consigo o meu usuario e a miña clave?

A primeira vez que queiras utilizar os ordenadores de uso público terás que te identificares no mostrador de calquera das bibliotecas co teu carné de socio/a e documento de identidade. Asignarémosche un usuario e unha clave que che permitirán realizar as túas reservas e acceder a calquera ordenador das bibliotecas.

Hai un límite de tempo diario?

Depende de cada biblioteca e sala (persoas adultas ou infantil). Nalgunhas poderás gozar dunha sesión por tempo ininterrompido, noutras cada persoa poderá gozar dunha sesión de entre unha e dúas horas de duración programadas en quendas consecutivas ao longo do día. Terás que conectarte á hora de inicio dunha sesión para gozar de todo o tempo que teña programado.

Ten en conta que a última sesión antes do peche das bibliotecas, sexa mañá ou tarde, acabará sempre dez minutos antes da hora de peche.

Son iguais os horarios das quendas e sesións en todas as bibliotecas?

Como se explica na resposta á pregunta anterior, non existen uns horarios idénticos en todas as bibliotecas porque estes adáptanse progresivamente ás necesidades de cada servizo e sofren readaptacións periódicas.

Se desexas saber con certeza en que quenda te podes conectar e canto tempo poderás usar o ordenador, consúltao previamente coa biblioteca que vaias visitar.

En que bibliotecas podo conectarme de modo ininterrompido?

Neste momento, gozan de horario ininterrompido os ordenadores de uso público dos seguintes espazos:

- Sala de persoas adultas: biblioteca Castrillón, Rosales, Sagrada Familia, Monte Alto e Ágora.

- Sala infantil: biblioteca Sagrada Familia, Monte Alto e Ágora.

Podo reservar un ordenador concreto?

Cando realices a túa reserva en liña poderás elixir a biblioteca na que te queres conectar pero o sistema non permite decidir sobre que ordenador queres efectuar a reserva. O sistema asigna os ordenadores de forma totalmente aleatoria.

Canto tempo permanece activa a miña reserva?

Todas as reservas caducan cando pasan 10 minutos desde a súa hora de inicio.

Hai ordenadores de uso exclusivo para menores?

Si, dispoñemos de postos de uso exclusivo para menores de 14 anos.

Que teño que ter en conta?

Debes respectar a configuración dos equipos, os seus arquivos e programas. Lembra que despois de ti conectarase outra persoa polo que che agredecemos que coides o material.

A biblioteca non é responsable da información que recuperes ou á que accedas.

O horario de acceso aos postos informáticos pode verse restrinxido pola realización de calquera actividade. Nese caso facilitarase o cambio de data ou hora da túa reserva.

Nin a biblioteca nin as persoas bibliotecarias podemos responsabilizarnos dos problemas técnicos dos ordenadores ou Internet, como a saturación da rede, a caída dos servidores, cortes de luz etc.

Todas as bibliotecas dispoñen de conexión a Internet sen arames ou fíos. Se vés co teu portátil, móbil ou tableta poderás conectarte gratis e sen necesidade de utilizar ningunha clave.

Nas bibliotecas municipais Ágora, Castrillón, Fórum, Monte Alto, Rosales e Sagrada Familia dispoñemos de aulas de informática nas que realizamos os cursos de alfabetización dixital. Ademais, se representas a unha asociación, ONG... e necesitas un espazo para levar a cabo unha acción formativa, non dubides en pedírnola!

Se estás a comezar a usar estas ferramentas interesarache saber que dispoñemos dun completo programa de formación con variadas ofertas tanto de iniciación a Internet como de web 2.0 ou web social. Se che interesa este tema consulta a sección Cursos de informática.

Nas bibliotecas dispoñemos dun servizo de  Atención tecnolóxica  con persoal dedicado a resolver as túas dúbidas co ordenador e as súas operacións básicas, a enviar e recibir mensaxes a través do correo electrónico, a navegar por Internet e ler prensa dixital, a mercar entradas ou realizar calquera procura de información.

Lembra que te podes inscribir nos cursos gratuítos que se organizan periodicamente nas bibliotecas e que podes empezar de cero.

Dispoñemos dunha sección de libros, revistas, CD, DVD sobre Internet, novas tecnoloxías, titoriais de programas informáticos, fotografía dixital, procesadores de texto, sistemas operativos etc. que che resultarán de utilidade tanto se te queres iniciar como se queres profundar nalgún destes temas. Recoñeceralos porque todos eles están baixo a sinalización 004 INFORMÁTICA

Quero buscar no catálogo o que teñen as biblios sobre este tema

Quero suxerir unha compra