Cales son as condicións do préstamo de xogos de mesa a entidades?

• Número de xogos: Podedes levar simultaneamente ata 5 xogos. Este número resta do total de libros, revistas e material audiovisual que podedes ter á vez (30 documentos).
• Prazo: O prazo de préstamo para xogos de mesa é de 15 días.
• Renovación: NON existe a opción de prórroga no préstamo de xogos de mesa a entidades, dado que o prazo de préstamo inicial é xa maior que para particulares.
• Petición de reserva: Se o xogo de mesa que buscades está prestado a outro lector ou lectora, ou outra entidade, existe a opción de reservalo. Poderedes reservar ata 2 xogos a un tempo.
• Dispoñibilidade da reserva: Cando os xogos de mesa reservados xa estean dispoñibles, avisarémosvos para que poidades recollelo na biblioteca na que o reservárades, dentro dun prazo máximo de 7 días. De non facelo nese prazo a reserva quedaría anulada.
• Préstamo entre as bibliotecas da Rede: Os xogos de mesa NON se envían entre bibliotecas. Se queredes un xogo doutra biblioteca municipal, hai que acudir a ela fisicamente e solicitalo.

Que hai que saber sobre a devolución do préstamo?

• Para a devolución de materiais non é preciso traer o carné e calquera membro da entidade poderá facela.
• Estamos certas de que entregarás os xogos en tan bo estado e co mesmo número de pezas coa que os retirásedes, o que se comprobará no momento da devolución.
• Ollo! Os xogos de mesa tedes que devolvelos na mesma biblioteca na que os retirárades en horario de apertura. 

Que ocorre se incumprimos os prazos ou perdimos algo do prestado?

• Incumprimento dos prazos de préstamo: O retraso na devolución conleva unha suspensión temporal do préstamo: un día por cada documento e día de retraso.
• A perda ou deterioro de material (ou parte del, como pezas dun xogo de mesa): Suporá repoñer o material extraviado ou deteriorado. Se xa non está dispoñible no mercado, contactade coa biblioteca na que o retirásedes para que vos orienten ou suxiran algún outro xogo de mesa de características similares.

Precisamos saber que xogos temos nas bibliotecas: o catálogo

Se queredes saber se nas bibliotecas temos xogos de interese para a vosa entidade, podedes consultar o catálogo. Dese xeito, comprobaredes en que biblioteca localizalo, se está prestado e cando é que o devolven.

De ter algunha dúbida, podedes contactar connosco.

Cales son as bibliotecas con xogos dispoñibles

• Biblioteca Municipal Ágora
• Biblioteca Municipal Durán Loriga
• Biblioteca Municipal Fórum
• Biblioteca Municipal Os Rosales

Para saber máis

Máis información sobre os  Xogos de mesa  picando na ligazón.